ڕێکخراوی ڕێگای ئازادی، کە بنکەکەی لە شانشینی یەکگرتووە و لە چوارچێوەی یاسایی کۆمپانیای LRJ Ltd کاردەکات، وەک دەنگێکی ڕەسەنی ڕەوەندی کوردی و داکۆکیکار لە مافەکانی مرۆڤ، یاداشتێکی فەرمی بەپەلەی پێشکەش بە کۆمەڵگەی نێودەوڵەتی و دامەزراوە سیاسییەکانی بەریتانیا کردووە، کە پاشەکشەی ترسناکانەی ئازادییەکان، سەرکوتی ڕێکخراو، و کولتوری بێ سزای زاڵ لە هەرێمی کوردستاندا ئیدانە دەکات.
لە یاداشتەکەدا وردەکاری کوشتنی هاووڵاتی حەسەن عەبدولڕەحمان، تەمەن 44 ساڵ، لە 13ی تەمموزی 2025، کە بە چەکی جەنگی هێزە ئەمنییەکانی پارتی دیموکراتی کوردستان لە میانی خۆپیشاندانێکی هێمنانەدا کە داوای خزمەتگوزاریی گشتیی لە قەزای سۆران کردبوو، شەهید بوو.
لە بەڵگەنامەکەدا بەڕوونی بکەری تاوانەکە (سەمەد عومەر، جێگری بەڕێوەبەری ئاسایشی سۆران) دەناسرێتەوە و ئیدانەی ئەو پارێزگارییە حزبییانە دەکات کە ڕێگری لە لێپێچینەوەکەی کردووە. زیاتر تیشک دەخاتە سەر شەپۆلێکی تۆقاندن و دانپێدانانی زۆرەملێ کە لە شایەتحاڵەکانەوە دەرهێنراون، ئەم پێشێلکاریانە وەک بەشێک لە زنجیرەیەک لە تیرۆری سیاسی و نەخشێکی مێژوویی بەردەوامی سەرکوتکردن لە ناوچەکەدا جێگیر دەکات، کە تێیدا دامەزراوە دادوەری و ئەمنییەکان کراونەتە ئامرازێک بۆ بێدەنگکردنی دەنگە ناڕازییەکان.
لە یاداشتەکەدا، LRJ چەند داواکارییەکی خستەڕوو کە ئاراستەی لایەنە پەیوەندیدارەکان کرابوون:
لێکۆڵینەوەی نێودەوڵەتی: دامەزراندنی کۆمیسیۆنێکی سەربەخۆ لە ژێر چاودێری یونامی و OHCHR بۆ لێکۆڵینەوە لە پێشێلکارییەکانی سۆران.
لێپێچینەوە لە تۆمەتبار: دوورخستنەوەی دەستبەجێی سەمەد عومەر لە پۆستەکەی و هەڵگرتنی پاراستنی حزبی و ڕەوانەکردنی بۆ دادگای بێلایەن.
پاراستنی چالاکوانان و شایەتحاڵان: دابینکردنی گەرەنتی یاسایی و جەستەیی بۆ خێزانی قوربانییەکە و هەموو شایەتحاڵەکان لە دژی هەر جۆرە تۆڵەسەندنەوەیەک.
ئازادکردنی زیندانیانی ویژدان: ئازادکردنی بێ مەرجی سەرجەم ڕۆژنامەنووسان و مامۆستایان و چالاکوانانی دەستبەسەرکراو و داخستنی کەیسەکانی پاڵنەری سیاسی.
سەپاندنی سزا نێودەوڵەتییەکان: سەپاندنی سزای شێوازی ماگنیتسکی بەسەر بەرپرسانی بەرپرسیار لەم پێشێلکاریانە، و مەرجدارکردنی هاوکارییە دارایی و سەربازییەکانی ڕۆژئاوا بۆ هەرێم.
LRJ بە فەرمی ئەم دۆسیەی یاسایی و مرۆیی پێشکەش بە ژمارەیەک لە دەزگا سەرەکییەکانی بڕیاردان و دیپلۆماسی نێودەوڵەتی کردووە، لەوانە: فەرمانگەی دەرەوە، کۆمۆنوێڵس و گەشەپێدانی بەریتانیا (FCDO)؛ لیژنەی کاروباری دەرەوەی پەرلەمانی بەریتانیا؛ کونسوڵخانەی گشتی بەریتانیا لە هەولێر؛ نێردەی هاوکاری نەتەوە یەکگرتووەکان بۆ عێراق (یونامی)؛ نووسینگەی کۆمیساریای باڵای مافی مرۆڤی نەتەوە یەکگرتووەکان (OHCHHR)؛ باڵیۆزخانەی کۆماری عێراق لە لەندەن؛ کونسوڵخانەی گشتی کۆماری عێراق لە مانجستەر؛ گروپی پەرلەمانی سەرجەم لایەنەکانی بەریتانیا (APPG) سەبارەت بە هەرێمی کوردستانی عێراق؛ لیژنەی لاوەکی پەرلەمانی ئەوروپا بۆ مافەکانی مرۆڤ (DROI)؛ ڕێکخراوی لێبوردنی نێودەوڵەتی؛ چاودێری مافی مرۆڤ؛ و پەیامنێرانی بێ سنوور (RSF).
LRJ پابەندبوونی نەگۆڕی خۆی بە خەباتی مەدەنی ئاشتیانە و پاراستنی کەرامەتی مرۆڤ و بەدواداچوونی دادپەروەری یاسایی دووپات دەکاتەوە. ڕێکخراوەکە ئامادەیی تەواوی خۆی دەربڕیوە بۆ پێشکەشکردنی هەر بەڵگەیەکی سەرەتایی و بەڵگەنامەیەکی ڤیدیۆیی و ئیفادەی مەیدانی بۆ هەر لایەنێکی نێودەوڵەتی کە بیەوێت بەدوای ئەم پێشێلکارییە ڕێکخراوانەدا بگەڕێت.
هاوتەریب لەگەڵ ئەوەشدا، ئەندامان و چالاکوانانی LRJ، وەک بەشێک لە هەڵمەتێکی مەدەنی فراوانتر، ناو و واژۆکانی خۆیان لەسەر داواکارییەکی تایبەتمەند تۆمارکردووە کە هاوپێچ کراوە بە یاداشتەکەوە - وەک دەربڕینێکی بەهێزی پشتیوانی و دەنگێکی جەماوەری بەکۆمەڵ لە پشت هەموو ئەو داواکارییە فەرمیانەی کە ئاراستەی لایەنە نێودەوڵەتییەکان کراوە لەم بەڵگەنامەیەدا.