ڕێکخراوی ڕێگای ئازادی لە 11ی ئایاری 2026، لەگەڵ ئەندامانی ڕێکخراو، چالاکوانان، ئەندامانی کۆمەڵگەی کوردی، و لایەنگرانی چاکسازی دیموکراسی، خۆپیشاندانێکی گشتییان لە… گڵاسگۆ لەژێر دروشمی "نا بۆ خراپ ئیدارەیی و عەشایەری و حوکمی تائیفی لە هەرێمی کوردستان و عێراق؛ بەڵێ بۆ سەروەری یاسا و دادپەروەری بۆ هەمووان."
لە خۆپیشاندانەکەدا تیشک خرایە سەر نیگەرانییەکان سەبارەت بە گەندەڵی سیاسی، کاریگەریی عەشایەری لەسەر دامەزراوەکانی دەوڵەت، جیاکاری، لاوازبوونی سیستەمی دادوەری و یاسایی لە عێراق و هەرێمی کوردستان. بەشداربووان جەختیان لە گرنگی حوکمڕانی دیموکراسی و لێپرسینەوە و یەکسانی لەبەردەم یاسا و پاراستنی مافە مەدەنی و مرۆڤەکاندا کردەوە.
لە میانی خۆپیشاندانەکەدا بەشداربووان لافیتە و پلاکاردیان هەڵگرتبوو و پەیامیان گەیاند کە داوای کۆتاییهێنان بە دەستوەردانی سیاسی و تائیفی لە دامەزراوە گشتییەکان دەکرد. هەروەها وتاردەران باسیان لەو هەڕەشە و تەحەددایانە کرد کە ڕووبەڕووی چالاکوانان، ڕۆژنامەنووسان و هاوڵاتیان دەبنەوە کە داکۆکی لە ڕوونی و چاکسازی و دادپەروەری دەکەن.
لە چوارچێوەی چالاکییەکەدا یاداشتێکی فەرمی بە ناونیشانی "قەیرانی حوکمڕانی و پێشێلکارییەکانی مافی مرۆڤ لە هەرێمی کوردستان و عێراق" پێشکەشکرا لەگەڵ داواکارییەکی گشتی کە واژۆی بەشداربووانی لەسەر بوو. لە یاداشتەکەدا داوای گرنگیدانی بەپەلەی نێودەوڵەتی بۆ تێکچوونی حوکمڕانی و پێشێلکردنی مافەکانی مرۆڤ و سنووردارکردنی ئازادییەکان و نەبوونی لێپرسینەوە لە عێراق و هەرێمی کوردستان.
یاداشت و داواکارییەکە بە فەرمی پێشکەشی باڵیۆزخانەی عێراق کرا. جگە لەوەش، کۆپیەکان لە ڕێگەی ئیمەیڵی فەرمی ڕێکخراوەکەوە بۆ فەرمانگەی دەرەوە، کۆمۆنوێڵس و گەشەپێدانی بەریتانیا (FCDO)، دەسەڵاتە پەیوەندیدارەکان، دامەزراوە نێودەوڵەتییەکان، و ڕێکخراوەکانی مافی مرۆڤ نێردراوە بە مەبەستی گەیاندنی نیگەرانی و داواکارییەکانی خەڵکی کوردستان و عێراق بە کۆمەڵگەی نێودەوڵەتی.
لەکۆتاییدا ڕێکخراوی ڕێگای ئازادی پێزانینی خۆی بۆ سەرجەم بەشداربووان و لایەنگرانی ئامادەبووانی خۆپیشاندانەکە دەربڕی و پابەندبوونی بەردەوامی خۆی بە چالاکی مەدەنی ئاشتیانە و بەها دیموکراسیەکان و دادپەروەری و پاراستنی کەرامەت و ئازادی مرۆڤ دووپاتکردەوە.
